Uşaqlıq boynunun eroziyası: mif və həqiqət

Həqiqi eroziya nədir?

Eroziya epitel qatının defekti — yəni selikli qişanın həqiqi zədələnməsi deməkdir. Uşaqlıq boynunun həqiqi eroziyasına isə qadınların yalnız kiçik bir hissəsində rast gəlinir.

Bəs onda niyə demək olar ki, hər ikinci qadın ginekoloji stolda bu sözü eşidir?

“Yalançı eroziya” — əslində nə görünür

Müayinədə “eroziya” adlandırılan görüntünün böyük əksəriyyəti ektopiya və ya ektropiondur. Bu, uşaqlıq boynunun daxili qişasının xarici səthə doğru yerdəyişməsidir. Yəni defekt yoxdur — sadəcə fərqli tipli hüceyrələr gözlə görünən sahədə yerləşir.

Ektopiya gənc qızlarda və hamilə qadınlarda tez-tez izlənilir, hormonal dəyişikliklərlə bağlıdır və əksər hallarda norma variantıdır. Müalicəsiz öz-özünə keçə bilər.

Həqiqi eroziya nədən yaranır?

• İltihabi proseslər — kolpit, servisit və s. (halların 80–90%-i)
• Travma — ginekoloji alətlər, pessarilər, halqalar. Bu tip eroziya adətən 1–2 həftə ərzində öz-özünə sağalır
• Spesifik xəstəliklər — sifilis, genital vərəm
• Uşaqlıq boynunun bədxassəli dəyişiklikləri — daha çox postmenopauza dövründə

Eroziya deyildikdə hansı müayinələr aparılmalıdır?

1. Uşaqlıq boynunun güzgülərlə müayinəsi
2. PAP test
3. Kolposkopiya — bədxassəli prosesə şübhə olduqda dəyişikliyin olduğu sahədən biopsiya
4. Cinsi yolla keçən infeksiyaların müayinəsi
5. Spesifik prosesə şübhə varsa — sifilis və vərəmin yoxlanması

Bu ardıcıllıq vacibdir. Müayinəsiz “yandırma” təklif olunursa, ikinci rəy almaq haqqınızdır.

Nə vaxt müalicə lazımdır, nə vaxt lazım deyil?

PAP testin nəticəsi normaldırsa və şikayət yoxdursa, əksər hallarda heç bir müdaxilə tələb olunmur — müntəzəm nəzarət kifayətdir.

İltihab varsa, əvvəlcə iltihab müalicə olunur; çox vaxt bundan sonra görüntü də dəyişir. Bol ifrazat davam edirsə və ya kolposkopiya dəyişiklik aşkarlayırsa, dərəcəyə görə diatermokoaqulyasiya, krioterapiya, CO₂ lazer və ya LEEP tətbiq oluna bilər.